HIKAYAT AMANG IKAK; Aji Sukor   Nek Jadi Raje

Ahada
HIKAYAT AMANG IKAK; Aji Sukor   Nek Jadi Raje
Amang Ikak (ist)

MUMPUNG SEBENTAR LAGI AKAN PILBUP

HIKAYAT AMANG IKAK

Aji Sukor   Nek Jadi Raje

 

 

Nek nua-nua bekaca, ukor duluk bajuk di badan

Dirik lah budu, ngaku hibat punya kemampuan 

Asal nguap, kenak kek inde kenak kek uman

Aji Sukor nek nyalon raje, asa benar asa ukan

 

Masalah pulitik kek birokrat dek paham mula

Badan teungkor-ungkor, lah mulai tua

Bute urop, dek pacak nulis dek pacak maca

Ancok gawi, kalok badan dek sadar kek rupa

 

Yang diandel,  sang sekarong, duit  sesumpet

Dek kek cukop, kek spandok ge tekarat kiret

Tambeh tabiat pok, mana medit agik pelet

Jen ngeleteh, along bekebun tanem lah karet

 

Urang mudel Aji Sukor, dek cucok men jadi raje

Terserah pudong, tesinggong dikit  nya ngeruce

Madeh garang, kiyun kene nabuh dade

Apa kerenyek, dek ngerawat  haram diraop gale

 

Biar lah tuan aji,  begaya mudek,  begatel ulik

Ade mentinak cikar, nya mulai tekusik-kusik

Asak tepudeng, dek ngerawat ayak dek ngerawat adik

Ati tengah kasmaran, apa dipintak nya berik

 

Soal mentinak, mimang jagok, susah dilawan

Rayuan e maot, dek peduli kek  adik kawan

Segale cara dipakai, dek pacak terus terang, nya pakai umpan

Ditulak mentinak, tahan bedukun, pakai ilmu  baye seluman

 

Negeri lah ancok tambeh ancok, kalok Aji Sukor sampai tepileh

Status lah aji, tapi cuma sungkok yang puteh

Lah tau lubang ular, jen ditampek jen dipereh

Kalok agik dipileh, Amang Ikak beguyur pindeh.

 

(*) kelekak lukok, 08032020